Байрамнынъ баш темсили - узунлыгъына 21 метр ве энине 12 метр олгъан къоджаман къырымта­тар миллий байрагъы олды. Махсус шу тедбир ичюн япылгъан ишбу байракъ Бурсадаки (Тюркие) къырымтатар дернегининъ башы Аднан Сюен тарафындан багъышланды.
Къырымтатар миллий байрагъы Акъмесджит­нинъ меркезий мейданында такъдим этильди. Тедбирге Къырымнынъ ве Украинанынъ дженюбий регионларындан кельген эки бинъден зияде адам кельди. Байрам тешкилятчыларындан бири — «Меджал» яшлар тешеббюсчи группасынынъ реиси Ли­дер Аджимамбетовнынъ бильдиргени киби, бай­ракъ башта Къырым украин музыкалы театри бинасынынъ ог тарафында асыладжагъы козьде тутулгъан эди. Лякин театрнинъ реберлиги бунъа къатиен къаршы чыкъкъан сонъ, байракъны мейданда такъдим этмек къарары алынды.
Иште, бир шейге бакъмадан, Къырымтатар мил­лий байрагъы кунюне кельген адамлар гъает хошнут къалдылар. Бу - Украина мустакъиль олгъан сонъ къырымтатарларнынъ биринджи умуммиллий байрамы олды.
Байрам девамында асфальт устюнде «Бизим тараф» ресимлер конкурсы, «Байракъ» фотоконкурсы, къырымтатар миллий емеклерининъ дадыны алув, курешчилернинъ чыкъышлары опып кечти. Конкурснынъ гъалиплери диплом ве дегерли бахшышпарнен такъдирлендилер. Бундан гъайры, байрам черчивесинде, автокъошу да отькерильди.
Байрамнынъ ресмий къысымы Къырым мусульманларынынъ муфтиси аджы Эмирали Аблаевнинъ окъугъан дуасынен башланды. Миллий Меджлис реиси, Украина халкъ депутаты Мустафа Джемилев хайырлав сёзлеринен чыкъышта булунды. О, бойле байрам халкъымызнынъ бирлик-бераберлигини сагъламлаштырмагъа ярдымлашкъаныны къайд этерек: «1917 сенеси къырым­татар халкъынынъ 1 Къурултайында миллий темсилимиз оларакъ кок тюслю тамгъалы байрагъымыз ресмий илян этильген эди. 1991 сенеси опып кечкен II Къурултайымызда кок байракъ миллий темсилимиз оларакъ танылды. Джемаат тешкилятларымыз II Къурултайнынъ башлангъан куню — июнь 26 Къы­рымтатар миллий байрагъы куню олмасыны теклиф эткен сонъ, Миллий Меджлис бунъа бирагъыздан къолтутты», — деп бильдирди. Айны вакъытта, Миллий Меджлис реиси Къурултайнынъ невбеттеки сессиясында июнь 26 куню Къырымтатар миллий байрагъы куню оларакъ ресмий байрам этиледжеги акъкъында къарар къабул олунаджагъыны айтты.
Байрам иштиракчилерини КъМДж Назирлер шурасы реисининъ муавини Азиз Абдуллаев да хайырлады.
Байрам буюк концертнен, Бурса къы­рымтатар дернегининъ башы ве «Джемаат» (Русие) тешкиляты реисининъ видеоселямлавларынен екюнленди.
Шу куню Сарабуз къасабасында бай­рам мунасебетинен суннет мерасими отькерильди эм де митинг ве концерт олып кечти.