Бисмилляхир-рахманир-рахим!
Азиз мусульманлар, урьметли семетдешлерим!
Алла-Таалянынъ юдже мерхамети иле кене мусульманларнынъ буюк байрамы - Ораза байрамыны къар-шыламакътамыз. Бу байрам мусульманлар ичюн бирлик, эйилик ве адалетнинъ нишанесидир. Мусульманлар мубарек Рамазан айы девамында Алла-Таалянынъ мерхаметине умют этип, ораза туттылар, намаз къылдылар, эйи ве гузель ишлер япмагъа тырыштылар.
Муминлер Ораза байрамыны севинч иле къаршылайлар, сой-сопны, якъынларны, дост-танышларны ве къолум-къомшуны бу мунасебет иле хайырлайлар.
Байрам куньлеринде ярдымымызгъа мухтадж кимселерни де унутмамалы. Келинъиз, къартларымызны, хусусан, япынъыз къалгъан ихтиярларымызны эп берабер хайырлайыкъ, балаларымызны, шу джумледен, оксюз къалгъан сабийлеримизни севиндирейик.
Рамазан айы эр бир мусульмангъа дюнья аяты, динимиз, маддии ве маневий дегерлер акъкъында даа чокъ тюшюнмек имкяныны берди.
Къырым мусульманлары диний идареси ве, шахсен озюмнинъ адымдан бутюн мусульманларны Ораза байрамы мунасебетинен хайырлайым. Эр бир эвде раатлыкъ ве эйиаллылыкъ укюм сюрьмесини нияз этем.
Алла-Тааля туткъан оразаларымызны, япкъан дуаларымызны къабул этсин! Амин!