Сабадан Медениет эви къаршысында байрамгьа азырлыкъ башланды, миллий урбалар кийген къызлар, кучюни косьтереджек йигитлер эеджанларыны гизлеп оламайлар. Оларгъа бираз да олса юрек бермек истеген чалгъыджылар шенъ аваларны чалалар. Меркезге этраф койлернинъ бедиий авескярлыкъ такъымлары, сакинлери кельди. Балабан стендде исе ерли фотоавескяр Себиля Заречнаянынъ «Меним юртум — Керич ярымадасы» фотосергиси нумайыш этилип, онынъ ресимлеринде Керич ярымадасынынъ текрарланмаз манзарасы, инсанлары акс эттирильген.
«Фиданлар» ве «Къайтарма» ансамбллерининъ оюнджылары, Экрем Абхаиров элиндеки кеманеден чыкъкъан тылсымлы нагьмелер байрамгьа кельгенлерни гьает хошнут эттилер. Энъ чокъ алгъышларны исе районда кечирильген «Чёль тарафнынъ фиданы» ярышы, «Фортуна» халкъара ярышы ве «Татлы сес» ярышынынъ гъалиби Арсен Исаметдинов къазанды.
Амма акъикъий усталыкъны халкъ йырларыны иджра эткен 75 яшлы Сервет агъа Исмаилов косьтерди. Адетимизге коре байрамда оюн-кулькю янъгъырады, куреш, къошулар олып, енъгенлер такъдирлен-ди. Дервизада шенъликнен бе-рабер хайырсеверлик де уну-тылмады. Эр кес къолундан кельгени къадар еди айлыкъ хаста сабий Ясмина Мамутова-нынъ тедавийленмеси ичюн иссесини къошты.
Байрамнынъ пек шенъ ве тешкилятлы кечмесинде Ленино къасабасы Медениет эвининъ усулджысы, фааль къадын Нияра Къараеванынъ хызмети буюктир. Бойле байрамларны Нияра Тейфукъовна мына энди 19 йылдан берли тешкиль этип, оларнынъ эр бири фаркълы олмасына, текрарланмамасына тырыша, янъы-янъы гъаелерни тюшюнип тапа. Шунынъ ичюн де керичлилер бу байрамны сабырсызлыкънен беклейлер. Байрам Ленин район меджлиси, ерли иш адамларынынъ маддий къолтутувында отькерильди.
Иште, сентябрь 22-ден кузь башланды, табиат раатланмагъа, биз исе янъы мевсимге азырланамыз.