Байрамгъа къарарнен 20 бинъ мусафирнинъ кельмеси козьде тутула. Ярымаданынъ сакинлеринден гъайры, Херсон ве Запорожье виляетлеринден эм де четэллерден де чокътан-чокъ мусафирлер беклениле. Бу акъта тешкилии комитетнинъ топлашувында КъМДж Назирлер шурасы реисининъ муавини Азиз Абдуллаев бильдирди.
Хыдырлез байрамыны отькерюв боюнджа тешкилии комитет тедбирлернинъ планыны ве месуль ишчи группанынъ теркибини тасдикълады. Байрамда къырымтатар амелий-манзаралы санат эшьяларынынъ сергиси, миллий либасларнынъ нумайышы, санатчыларнынъ концерти, ат къошулары, «Куреш» боюнджа ярыш, шахмат боюнджа турнир, миллий емеклер конкурсы ве дигер эгленджели тедбирлер отькериледжек.