Бутюндюнья къырымтатарлар конгрессининъ президенти Рефат Чубаров, Меджлиснинъ информацион сиясети ве джемаат тешкилятларынен алякъалар боюнджа идаре башы Шевкет Къайбуллаев, Меджлиснинъ тышкъы алякъалар болюгининъ башы Али Хамзин, Къырымтатар халкъы геноцидини огренюв ве онынъ акъибетлерини ёкъ этюв боюнджа Къурултайнынъ махсус комиссиясы реисининъ муавини Эльведин Чубаров иштирак эткен корюшюв девамында Мустафа Джемилев ве Рефат Чубаров мусафирлернинъ къырымтатар халкъынынъ Къырымгъа къайтув огърундаки курешининъ тарихына, Украинада къырымтатарларнынъ бугуньки вазиети, озь-озюни идаре этюв миллий органларнынъ фаалиетине ве озь халкъынынъ проблемлерини чезювде девлет органларынен озьара чалышувгъа дайр суаллерине джевап бердилер.
«Русие джезалангъан халкъларынынъ бирлиги» делегациясынынъ азалары Кавказ ве Къалмыкъыстаннынъ сюргюн этильген халкъларынынъ акъ-укъукълары тикленильмеси саасындаки меселелер хусусында сёз юрсеттилер. Мусафирлернинъ къайд эткенине коре, бу джерьян эм федераль, эм региональ севиеде маниаларгъа расткеле. Русие Федерациясы бундан йигирми йыл эвельси къабул эткен «Джезалангъан халкъларнынъ акъланылувы акъкъында» ве «Сиясий баскъы къурбанларыны акълав акъкъында» къанунлары деерлик чалышмай ве демек ки, Русиеде кечмиште джеза ве баскъыгъа огъратылгъан халкъларгъа нисбетен япылгъан джинаетнинъ акъибетлерини ёкъ этювни асла да теминлемей.
Бунынъ киби де корюшювде толусынен акъланув меселелери боюнджа чешит сааларда бирликте иш алып барув имкянлары, СССР девиринде сюргюн этильген халкъларнынъ огюнде девлетнинъ месулиети музакере олунды. Тарафлар СССР джезалангъан халкълар къурултайыны кечирмек зарурлыгъы хусусындаки фикирнен разы олып, къурултайны Украинада кечирмек имкянларыны бакътылар.