Корюшювде бунынъ киби Бутюндюнья къырымтатар конгрессининъ реиси Рефат Чубаров ве Миллий Меджлис тышкъы  алякъалар  болюгининъ башы Али Хамзин иштирак эттилер. Корюшюв девамында Романия ве къырым­татар алимлерининъ эки халкъ арасындаки тарихий багъларны огренюв боюнджа бир сыра теклиф ве конкрет тешеббюслери бакъылды. Романияда къырымтатар диаспорасынынъ тиль, медениет ве диний озьгюнлигини сакълап къалув боюнджа фааллиги къайд этилип, бу фаалиет Романиянынъ Авропа Бирлигине кирген сонъ даа зияде кенишлегени ве бу ал халкъ­ара джемаатчылыкъкъа къы­рымтатар халкъынынъ озь юртунда акъ-укъукъларынынъ тикленмесине янъы имкянлар бергени айтылды.
Корюшюв девамында Мил­лий Меджлис реиси Мустафа Джемилев Романия алимлери­нинъ къырымтатар халкъы­нынъ миллий курешине аит бир сыра суаллерине джевап берип, алимлерге конференция ишинде мувафакъиет тиледи.
Майыс 1 куню Багъчасарайда Исмаил Гаспринскийнинъ эв-музейинде Романия ве Къы­рым ханлыгъы арасындаки та­рихий багъларгъа багъышлангъан халкъара конференция олып кечти. Четэль делегациясына Романия мусульманлары тюрк-татар демократик бирлиги реисининъ муавини Самир Минан етекчилик япты. Романия делегациясына Рома­ния Академиясы «A. D. Хепого» тарих институтынынъ етекчи ильмий тедкъикъатчысы Вениамин Чобану, Романия академиясы Николай Иорга адына тарих  институтынынъ баш ильмий тедкъикъатчысы Виргиль Чокылтан, психология ве педагогика илимлери факультетининъ деканы профес­сор Келын Фелезеу, Романи­янынъ Азербайджан ве Турк-менистандаки сабыкъ эльчиси, Бабеш-Боян университети Тюрк ве Орта Асия тедкъикъатлары институтынынъ директоры Тасин Джемиль, Ро­мания Илимлер академиясы Миллий археология музейи директорынынъ муавини, про­фессор Еуген Николае, «GEOPOLITIKA» меджмуасынынъ директоры, языджы Василе Симилеану кирдилер.