Акъмесджитте маршрут таксилеринден файдаланув фияты 2 гривнядан 3-4 гривнягъа артаджагъы козьде тутула. Ал-азырда шеэр иджра комитетинде тарифлерни котерюв меселеси бакъылмакъта. Транспорт ве алякъа боюнджа шеэр идаресининъ башы Нариман Мусаевнинъ бильдиргени киби, былтыр де­кабрь айында ёлджу ташыйыджылар иджра комитетке тарифлерни 2,5-3,5 гривнягъа арттырув теклифинен мураджаат эткенлер, лякин Йылбаш байрамларындан сонъ олар фиятны 3-4 гривнягъа къадар котермек акъкъында янъы теклифнен бир даа мураджаат эткенлер.

«Крымхлеб» акционерлик джемиети отьмекнинъ фиятла­ры котерильгенини бильдирди. Фиятлар Аграр фонды, Къырым Назирлер шурасы ве «Крымхлеб» арасындаки анълашма эсасында котерильгени къайд этиле. «Украинский новый формовой», «Пшеничный фор­мовой», «Крымский» киби отьмек чешитлерининъ фиятлары 5-20 капикке котерильди. «Газ, бензин ве махсулатларнынъ фиятлары арткъаныны эсапкъа алып, отьмек фиятларыны минималь котердик», — дей-лер отьмекчилер.

Электрик энергияны регулирлев бо­юнджа миллий комиссия бир айда 150 киловаттан зияде электрик энергиясы истимал эткен гражданлар февраль 1 -ден башлап янъы тариф боюнджа тёлейджеклерини бильдире. Бойледже, 150 киловаттан арткъач олгъан эр бир ки­ловатт ичюн тарифнинъ 30 файызы микъдарында къошма акъ тёленеджек. Яни 150 киловаттан зиядесининъ эр бир киловатты 25 капик дегиль де, 31,67 ка­пик оладжакъ.